غم سبھی راحت و تسکین میں ڈھل جاتے ہیں

سبھی راحت و تسکین میں ڈھل جاتے ہیں

جب کرم ہوتا ہے حالات بدل جاتے ہیں

 ________________________________

ان کی رحمت ہے خطا پوش گنہ گاروں کی

کھوٹے سکے سرِ بازار بھی چل جاتے ہیں

________________________________

اپنی آغوش میں لے لیتا ہے جب ان کا کرم

زندگی کے سبھی انداز بدل جاتے ہیں

________________________________

اسمِ احمدﷺ کا وظیفہ ہے ہر اک غم کا علاج

لاکھ خطرے ہوں اسی نام سے ٹل جاتے ہیں

________________________________

رکھ ہی لیتے ہیں بھرم ان کے کرم کے صدقے

جب کسی بات پہ دیوانے مچل جاتے ہیں

________________________________

اُمتِ احمدِ مختارﷺ نہیں ہو سکتے

اور ہیں اور جہنم میں جو جل جاتے ہیں

________________________________

آپڑے ہیں ترے قدموں میں یہ سن کر ہم بھی

جو ترے قدموں پہ گرتے ہیں سنبھل جاتے ہیں

________________________________

مطمئن ہوں گے مگر دیکھ کے جلوہ ان کا

ہم نہیں وہ جو کھلونوں سے بہل جاتے ہیں

________________________________

آپﷺ کو کعبئہِ مقصود ہی مانوں خالدؔ

آپﷺ کے در پہ سب ارمان نکل جاتے ہیں

________________________________

خالد نقشبندی